د هوايي ډګر له څلورلارې څخه تر ګمرک سیمې پورې د سړک جوړولو پروژه د ښه کاري پرمختګ په لرلو سره بشپړېدو ته نږدې شوې او ټاکل شوې ده ډېر ژر د سړک د پاتې برخو قیر چارې ترسره او د ترافیکو پرمخ پرانیستل شي. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه سړک چې (۲۷۹۴) متره اوږدوالی او (۶۰) متره سور لري، په دوه اصلي لیکو کې ډیزاین شوی دی. د دې سړک لومړۍ او دویمه طبقه قیر چارې بشپړې شوې دي او یوازې د (۱۰۰) متره برخې قیرچارې یې پاتې دي چې، هغه به هم ډېر ژر قیر شي. ورته مهال د پلیو لارو او ګلدانونو جوړولو، د جدلونو او د څراغونو نصبولو چارې په دوامداره توګه روانې دي څو دا لویه پروژه په معیاري توګه بشپړه شي. همدا راز د دې سړک درېیمه ( وروستۍ) طبقه قیر چارې به هم په دوه اصلي لیکو کې د ژمي تر را رسېدو وړاندې ترسره شي. د دې پروژې له بېلابېلو کاري پړاونو څخه د کابل ښاروالۍ انجنیران په دوامداره توګه فني او تخنیکي څارنې ترسره کوي. د دې سړک په جوړېدو سره به له یوې خوا د صحت عامې، مکروریانو او د هوايي ډګر د څلورلارو ترافیکي ګڼه ګوڼه د پام وړ کمښت ومومي او بله خوا به د کابل ښار اقتصادي ودې ته زمینه برابره شي. د یادونې وړ ده چې، په دې پروژه کې د یوه کانال او پلچکونو جوړول او د ترافیکي نښو نصبول هم شامل دي