د دوه ویشتمې ناحیې اړوند د بګراميو پروژې لویدیځ خوا ته د کمري سیمې سړک دویمه طبقه قیر چارې پیل شوې او اړوند مسئولین هڅه کوي تر څو دغه پروژه د ژمي له پیل وړاندې بشپړه او ګټې اخیستنې ته وسپارل شي. دغه سړک چې په ټولیزه توګه (۲۵۸۶) متره اوږدوالی لري، د (۱۲۵۵) مترو په اوږدوالي، (۲۶ او ۳۱) مترو په سور سره برخه به قیر او د (۱۳۳۱) مترو په اوږدوالي او (۶.۵) مترو په سورسره برخه به یې کانکریټ شي. د کابل ښاروالۍ د برنامو او پروژو د تنظیم ریاست د مسئولنو په وینا؛ د یاد سړک د قیر چارو سربېره، اوس مهال د کانکریټي برخې د جوړولو چارې هم روانې دي او ټاکل شوې ده ډېر ژر یې کانکرېټ چارې پیل شي. په دې پروژه کې د ( ۱۲۵۵) مترو په اوږدوالي او (۲) مترو په سور د اوبو یوه لوی کانال، د (۴.۴) مترو په اوږدوالي، (۳) مترو په سور سره د (۴۶) پلچکونو او د (۸۵) مترو په اوږدوالي، (۲.۷) مترو په لوړوالي، له (۱.۹) څخه تر (۲.۱) مترو پورې سور سره د استنادي دیوال، لښتیو، پلیولارو او ګلدانونو جوړول، د څراغونو نصبول، په سړک د کرښو اچول او د یوه معیاري سړک نور جزیات هم شامل دي. دغه سړک چې د متوازنې پراختیا د اصل پر بنسټ او د کابل ښاروالۍ د پراختیایي پلان مطابق جوړېږي، د ترانسپورتي زیربناوو په پراختیا، د ترافیکي ګڼې ګوڼې د کمښت او د ۲۲ مې ناحیې اوسېدونکو ته د آسانتیاوو په رامنځته کولو کې مهم رول لري.