د اتمې او شپاړلسمې ناحیو اړوند د کارته نو- قلعه زمان خان د سړک جوړولو چارې (۵۰) سلنه پرمخ تللې او هڅه کېږي چې، هر څه ژر قیر کولو ته چمتو شي. دا سړک چې، (۳۰۷۰) متره اوږدوالی او (۳۰) متره سور لري، د لښتیو، د (۱۹۰۰۰) متر مکعب په اندازه استنادي دېوال، پلیو لارو، ګلدانونو، د بایسکل چلولو لیکو، څراغونو او په سړک د کرښو اچولو په ګډون ډیزاین شوی دی او هڅه کېږي چې، په کمه موده کې یې د جوړولو چارې بشپړې او ګټې اخیستنې ته وسپارل شي. د کابل ښاروالۍ مسئولین وايي چې، د دې پروژې په بشپړېدو سره به ښاریانو ته د تګ راتګ په برخه کې ګڼې آسانتیاوې رامنځته او د ورڅېرمه سړکونو ترافیکي ګڼه ګوڼه به کمښت ومومي. ورته مهال د قلعه زمان خان له عمومي سړک څخه د کابل- جلال آباد تر سړک پورې د سړک جوړولو چارې هم روانې دي چې، د دغو دوو پروژو په بشپړېدو سره به په ترانسپورتي، ټولنیزو او ښاري برخو کې ګڼې آسانتیاوې رامنځته شي