د کابل ښاروالۍ د کار، ساتنې او مراقبت ریاست له خوا د بنسټیزو چار تر بشپړېدو وروسته د دېوان بیګي- مهتاب قلعه نوي نښلوونکي سړک له پاتې برخو څخه د یوې برخې قیر چارې پیل شوې. دغه سړک د پنځمې، شپږمې او دیارلسمې ناحیو اړوند له دېوان بیګي سیمې څخه تر مهتاب قلعه پورې، ۱۷۳۳ متره اوږدوالی او ۳۰ متره سور لري چې، د ۷۰۰ مترو په اوږدوالي یوې برخې قیر چارې یې مخکې ترسره شوې دي او اوس مهال یې د ۶۰۰ متره نورې برخې قیر چارې تر لاس لاندې دي چې، د ژمي تر را رسېدو وړاندې به یې د پاتې برخو قیر چارې هم ترسره شي. همدا راز د دې سړک په اوږدو کې د کابل سیند د پاسه د ۲۱.۵ مترو په اوږدوالي او د ۲۰ مترو په سور سره د موټرو د تګ راتګ پله د جوړولو چارې هم ۹۰ سلنه مخته تللې دي. د دې سړک او پله په جوړېدو سره به د کمپنۍ او برچي سړکونو ترافیکي بهیر ووېشل شي او همدا راز د ترانسپورتي آسانتیاوو رامنځته کېدو سربېره به د ورڅېرمه سیمو اقتصادي ودې ته زمینه برابره شي