د استملاکي ملکیتونو او نورو خنډونو تر پاکولو وروسته، د دیارلسمې ناحیې اړوند د نقاش له حمام سیمې څخه تر امید سبز ښارګوټي پورې د برچي د نوي نښلوونکي سړک د جوړولو عملي چارې پیل شوې. په دې پروژه کې چې (۳) کیلو متره اوږدوالی او (۳۰) متره سور لري، د لښتیو، پلیو لارو او ګلدانونو جوړول، د څراغونو نصبول، په سړک د کرښو اچول او د یوه معیاري سړک نور جزئیات هم شامل او په نږدې یوه کال کې به په اساسي توګه بشپړه شي. د دې سړک په جوړېدو سره به له یوې خوا د برچي سړک ترافیکي ګڼه ګوڼه کمښت ومومي او بله خوا به د ورڅېرمه سیمو اقتصادي ودې ته زمینه برابره شي. دا پروژه د کابل ښار د سړکونو د پراختیا په برخه کې د کابل ښاروالۍ یو مهم ګام ګڼل کېږي چې، په بشپړېدو سره به یې د کابل د لوېدیځې سیمې اوسېدونکو ته ګڼې آسانتیاوې رامنځته شي