د کابل ښاروالۍ له لوري د احمد شاه بابا مېنې اړوند له نوروز آباد ( ایمل مومند) څلورلارې څخه تر دولسمې امنیتي حوزې پورې د نوي نښلوونکي سړک د خنډونو پاکولو او د اساسي برخو د جوړولو چارې روانې دي. دا پروژه چې، ۲۰۹۶ متره اوږدوالی، ۳۰ او ۴۰ متره سور لري، لښتي، پلې لارې، ګلدانونه، د بایسکل چلولو لیکې، څراغونه او د یوه معیاري سړک نور جزئیات په بر کې نیسي او ټاکل شوې ده چې تر راتلونکو ۹ میاشتو پورې بشپړه شي. د دې سړک په اوږدو کې ۸۶ ملکیتونه تر استملاک لاندې دي چې، مالکانو ته به یې د قانون او کړنلارې له مخې بدیل حقونه ورکړل شي. له نوروزآباد څلورلارې څخه تر دولسمې امنیتي حوزې پورې سړک د ترانسپورتي زیربناوو د پراختیا او د تګ راتګ لپاره د آسانتیاوو د رامنځته کولو په برخه کې ځانګړی اهمیت لري