د پنځمې ناحیې اړوند له قلعه وزیر سیمې څخه د کمپنۍ تر سړک پورې د نوي نښلوونکي سړک دویمه طبقه قیر چارې د ودانیزو توکو تر لابراتواري آزمایښت وروسته په بریالیتوب سره ترسره شوې. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه سړک چې، ۳۷۱ متره اوږدوالی او ۲۰ متره سور لري، د لښتیو او پلیو لارو په ګډون ډیزاین شوی دی او چارې یې وروستیو پړاونو ته رسېدلې دي چې، ډېر ژر به ګټې اخیستنې ته وسپارل شي. د دې پروژې له پلي کولو څخه موخه، په کابل ښار کې د ترافیکي او ترانسپورتي زیربناوو پراختیا او ښاریانو ته د تګ راتګ په برخه کې د آسانتیاوو رامنځته کول دي. د دې سړک په جوړېدو سره به د سیمو متوازنې پراختیا ته زمینه برابره او اوسېدونکي به یې ګڼو ښاري، ټولنیزو او ترانسپورتي آسانتیاوو ته لاس رسی ومومي