د کابل ښار د زرغونتیا او سمسورتیا په موخه د خیرخانې کوتل په اوږدو کې آزادۍ پارک او وزیرمحمد اکبرخان پارک کې د ناجو، مورپان او سرو د زرګونو نیالګیو د کېنولو چارې پیل شوې.
د زرغونتیا ریاست د مرستیال مولوي محمد شاه همت په وینا؛ دا نیالګي د پلان له مخې مخکې چمتو او روزل شوي دي چې، په معیاري توګه به کېنول شي او په دوامداره توګه به ترې ساتنه وشي.
نوموړي هیله وښوده چې، ښاریان به د ښار په کچه د نیالګیو او ونو د کېنولو په برخه کې د کابل ښاروالۍ له زرغون اغوستونکو سره همکار و اوسي.
د کابل ښاروالۍ د زرغونتیا ریاست ژمنتیا لري چې، د ښار په پارکونو، زرغونو سیمو او ګلدانونو کې زرګونه میوه لرونکي او بې میوې نیالګي او زنیتي بوټي کېنوي.
ورته مهال د اوولسمې ناحیې رئیس مولوي حبیب الحق حقاني په آزادۍ پارک کې د نیالګیو له کېنولو خوښي وښوده او د سیمې د اوسېدونکو په استازیتوب یې د هر راز همکارۍ ژمنه وکړه.
د ښار په پارکونو او زرغونو سیمو کې د نیالیګو کېنولو چارې روانې دي