د کابل ښاروالۍ د کار، ساتنې او مراقبت ریاست له خوا تر تخنیکي او فني ازمایښت او د بنسټیزو چارو تر بشپړېدو وروسته، د خیرخانې کوتل سړک د درېیمې برخې قیر چارې په منظمه توګه روانې دي.
تر اوسه د یاد سړک ۲ کیلو متره برخه قیر شوې ده او د پاتې برخو د جوړولو چارې یې روانې دي څو هغه هم قیر کولو ته چمتو او په ټاکلي وخت یې چارې بشپړې شي.
د خیرخانې کوتل سړک درېیمه برخه د یولسمې او اوولسمې ناحیې اړوند له سرای شمالي څلورلارې څخه د کوتل تر پورتنۍ برخې (د ګاز او نفتو ادارې تر مخې پورې) ۳۶۴۷ متره اوږدوالی او ۲۷ متره سور لري چې، د یوه معیاري سړک د ټولو جزئیاتو په ګډون به په معیاري توګه جوړ شي.
د خیرخانې کوتل سړک د کابل د شمال له اقتصادي دهلیزونو څخه شمېرل کېږي چې، د تګ راتګ لپاره د آسانتیاوو رامنځته کولو په برخه کې ځانګړی اهمیت لري.
کابل ښاروالۍ هڅه کوي څو د دې سړک د جوړولو چارې په ټاکلي وخت او لوړ کیفیت بشپړې او د ترافیکو پرمخ یې پرانیزي.
د خیرخانې کوتل سړک د درېیمې برخې قیر چارې روانې دي