د بنستيزو برخو تر جوړېدو وروسته، د کابل ښاروالۍ له خوا د دولسمې ناحیې اړوند د احمدشاه بابا مېنې په سیمه کې له نوروزآباد (ایمل مهمند) څلورلارې څخه د دولسمې امنیتي حوزې تر څنګ پورې د نوي نښلوونکي سړک قیر چارې پیل شوې.
دغه سړک د ۲.۰۹۶ مترو په اوږدوالي، ۳۰ او ۴۰ مترو په سور سره، د لښتیو، پلیو لارو، ګلدانونو، څراغونو او په سړک د کرښو اچولو په ګډون ډیزاین شوی دی.
په لومړي پړاو کې به د دې سړک ۸۱۰ متره برخه په دوو لینونو کې قیر شي چې، په ټولیزه توګه ۱۶۲۰ متره کېږي.د پلان له مخې د یاد سړک د پاتې برخو د جوړولو چارې هم روانې دي څو هغه هرڅه ژر قیر کولو ته چمتو شي.
د دې سړک په جوړېدو سره به ښاریانو په ځانګړې توګه د دوولسمې ناحیې اوسېدونکو ته د تګ راتګ په برخه کې ګڼې آسانتیاوې رامنځته او د سیمو اقتصادي ودې ته به زمینه برابره شي.
د کابل ښاروالۍ د برنامو او پروژو د تنظیم ریاست انجنیران د یادې پروژې له ټولو کاري پړاوونو څخه تخنیکي او فني څارنې ترسره کوي څو یې کیفیت تضمین او پروژه په ټاکلي وخت بشپړه شي.
له نوروزآباد څخه تر دولسمې امنیتي حوزې پورې د نښلوونکي سړک قیر چارې پیل شوې