د دولسمې ناحیې اړوند د احمدشاه بابا مېنې له دویم بلاک څخه د بګراميو تر سړک پورې د نښلوونکي سړک د بنسټیزو برخو د جوړولو چارې په چټکۍ سره روانې دي او هڅه کېږي چې دغه سړک د روان کال په ترڅ کې، انشاءالله، جوړ او د ګټې اخیستنې لپاره چمتو شي.
د سړک جوړولو په دې پروژه کې چې، ۱.۵ کیلومتره اوږدوالی او ۲۰ متره سور لري، د لښتیو، پلیولارو، ګلدانونو او د استنادي دېوالونو جوړول، د څراغونو نصبول او په سړک د کرښو اچول هم شامل دي.
د دې نوي سړک په جوړېدو سره به له یوې خوا د احمدشاه بابا مېنې او بګرامیو ترمنځ اړیکې پیاوړې او بله خوا به د ملالۍ (بتخاک) څلورلارې د ترافیکي ګڼې ګوڼې د کمښت سربېره، ښاریانو ته د چټک، آسانه او منظم تګ راتګ زمینه هم برابره شي.
د کابل ښاروالۍ د برنامو او پروژو د تنظیم ریاست انجنیران په دوامداره توګه د دې پروژې د پلي کېدو بهیر له نږدې څاري، څو یې ټول کاري پړاوونه د تخنیکي ځانګړتیاوو مطابق، ټاکل شویو معیارونو او په ټاکلي وخت ترسره شي.
د احمدشاه بابا مېنې–بګراميو نښلوونکي سړک د بنسټیزو برخو د جوړولو چارې په چټکۍ روانې دي