کابل ښاروالۍ د ترانسپورټي شبکې د ښه والي او ښاریانو ته د تګ راتګ د آسانتیاوو رامنځته کولو په موخه، د ۱۶مې ناحیې اړوند د قلعه زمانخان په پروژه کې د ۱۳م، ۱۴م، ۱۵م او ۱۶م مکروریانو د اصلي سړکونو د جوړولو چارې روانې ساتلې دي.
دغه سړکونه چې، په ټولیزه توګه ۲.۸۳۰ متره اوږدوالی او ۳۰ متره سور لري، د لښتیو، پليو لارو، پلګوټو، ګلدانونو، څراغونو، د بایسکلچلولو لیکو او په سړک د کرښو اچولو په ګډون طرحه شوي دي.
د دغو سړکونو په جوړېدو سره به د قلعه زمانخان عمومي سړک د اوبو رسولو نوي سړک او د الوخېل له سړک سره ونښلول شي.
د دې پروژې پلي کول به د سیمې اوسېدونکو ته د تګ راتګ په برخه کې د آسانتیاوو رامنځته کولو سربېره، د ترافیکي نظم په ښهوالي، د ښاري لارو ترمنځ د اړیکو په پیاوړتیا او په سیمه کې د اقتصادي فعالیتونو د ودې لپاره د زمینې په برابرولو کې مهم رول ولوبوي.
پاتې دې نه وي چې، دغه پروژه به، انشاءالله، په راتلونکو لسو میاشتو کې بشپړه او ګټې اخیستنې ته وسپارل شي.
د قلعه زمانخان د مکروریانو د ښاري اصلي سړکونو د شبکې پراختیا