د کابل ښاروالۍ له خوا د دولسمې ناحیې اړوند د احمدشاه بابا مېنې په سیمه کې، له نوروزآباد (ایمل مومند) څلورلارې څخه د دولسمې امنیتي حوزې ته څېرمه پورې د نوي نښلوونکي سړک دویمه طبقه قیر چارې د شپې له خوا روانې دي.
د کابل ښاروالۍ د برنامو او پروژو د تنظیم رئیس انجنیر میر الرحمن ناصري وايي چې، له کیفیت څخه د ډاډ ترلاسه کولو په موخه، د دې سړک قیرچارې د تخنیکي معیارونو مطابق او په لابراتوار کې د اړینو توکو تر آزمایښت وروسته ترسره کیږي.
د سړک جوړولو په دې پروژه کې چې ۲۱۹۶ متره اوږدوالی او له ۳۰ څخه تر۴۰ مترو پورې سور لري، د لښتيو، پلیو لارو او ګلدانونو جوړول، د څراغونو نصبول او د یوه معیاري سړک نور جزئیات هم شامل دي.
د دې سړک په جوړېدو سره به ښاریانو ته د تګ راتګ په برخه کې ګڼې آسانتیاوې رامنځته او د دولسمې ناحیې اړوند نورو سړکونو ترافیکي ګڼه ګوڼه به کمښت ومومي.
د یادونې وړ ده چې، د شپې په شفټ کې کار کول، د ودانیزو فعالیتونو پرمختګ ته زمینه برابروي.
د نوروزآباد – دولسمې امنیتي حوزې د سړک دویمه طبقه قیرچارې د شپې له خوا روانې دي