د کابل ښاروالۍ د ټولنیزو او کلتوري چارو معینیت له لوري نویو ټاکل شوو ګذر وکیلانو ته د باورلیکونو د ویش لړۍ، د ټولنیزو او کلتوري چارو د مرستیال مولوي حبیب الرحمن منصوري له لوري پیل شوه. د کابل ښاروالۍ د ټولنیزو او کلتوري چارو مرستیال په دې اړه وویل چې، د دې باورلیکونو پر بنسټ به ګذر وکیلان د ادارو په کچه رسمیت پیدا کړي او د خپلو مسئولیتونو او مکلفیتونو په ترسره کولو کې به باوري و اوسي. ورته مهال ګذر وکیلانو د کابل ښاروالۍ د پلانونو او پروګرامونو په پلي کېدو کې د هر راز مرستې ډاډ څرګند کړ او زیاته یې کړه چې د ښاري ژوند د قانوني کولو او نظم لپاره به خپلې هڅې دریغ نه کړي. د یادونې وړ ده چې په لومړۍ ورځ د کابل ښاروالۍ له لوري ۲۶ ګذر وکیلانو ته باورلیکونه ورکړل شول او ټاکل شوې ده چې د ښار په کچه ټولو ګذر وکیلانو ته باور لیکونه وویشل شي.